Технология фенинден ачыкъ дерснинъ план-конспекти.

5 сыныф

Технология фенинден ачыкъ дерснинъ план-конспекти.

 

Мевзу: Квиллинг техникасында япылгъан шейлер.

Макъсат :Квиллинг  техникасынен талебелерини таныштырув. Дерсте алынгъан бильгилернен файдаланув.

 Меселелер:

Огретюв : Санаатнынъ янъы чешити - «квиллинг» акъкъында бильгини шекиллендирюв.

Инкишаф эттирюв: Эр бир талебеде  фикир этювни, иджадий имкяныны, меракъны, алышкъанлыкъны, кягъытнен чалышувны, эллернинъ уфакъ моторикасыны инкишаф эттирюв.

Тербиелев : Талебелерде темизлик, джыйнакъиш медениети, коллективде чалышувны тербиелемек .

 Огретюв усуллары:

—Икяе этюв;

—Азыр ишлернинъ корьсетюви (демонстрациясы).

—Янъы мевзунынъ беяны иле субет;

—Амелий (практик) иш.

Мальземелер:

—Мультимедия презентациясы «Квиллинг», макъас, ПВА туткъалы, индже агъач таячыкълары, эки тарафлы ренкли кягъыт, компакт –диск.

Дерснинъ къурулув шекили: группаларда чалышув, озь ишлерининъ презентациясы (мини-серги).

Лугъат иши:

—квиллинг;

—кягъытсарув; яни  кягъыт бурмакъ(кягъытбурув).

—кягъыт филиграни,

—кягъыт гырджывасы.

Дерснинъ чешити: янъы бильги алув дерси, дерс-иджат

                            Дерснинъ кетишаты.

1.Тешкилий муит.

Талебелернен селямлашув.

Талебелернинъ дерске азырлыкъларны тешкерюв.

Талебелернинъ психологик кейфиети.

2.Меселени къоюв

   Оджа: Баланынъ иджады ичюн энъ биринджи мальземе (материал) – бу кягъыттыр. Кягъыт – бу пек ифадели ве енгиль мальземе. Ондан чешит шейлер япмакъ мумкюн. Кягъыт пластикасынынъ чешит чешитлери бар. Бизлерде энъ зияде белли кягъыттан чешит шекиллер япылгъан санаат – оригами. Бугунь мен сизни даа бир техниканен таныш этеджем – бу кягъыт-бурув санаты, яне гъарпта айткъанлары даин – квиллинг.

   Дерсимизнинъ мевзусы “квилинг техникасында япылгъан шейлер”. Бельки, сизлер энди бу иджатнен таныштырсыз?

Талебелернинъ джевабы.

3. Янъы мевзунынъ беяны (янъы мевзунынъ огренюв)

   Квиллингнинъ тарихы

   Квиллинг – бу узун ве тар кягъыт ёлачыкъларны бурув шеклини денъиштирип, олардан колемли (объёмный), яни тюзлюк (плоский) композициялар япув.

   Бугунь биз бу техниканен таныш оладжакъмыз. Кягъыттан орьнеклернинъ эсас шекиллерини япмагъа огренеджекмиз.

  Бакъынъ, не къадар чокъ дюльбер шейлер бу техника ярдымнен япмакъ мумкюн. Олардан бирисини бизлер бугунь япмагъа тырышармыз. Бу – керек олмагъан эски компакт – дисктен япылгъан панно.

   Энъ биринджиден, бизге бу иште керек оладжакъ алетлернен таныш олайыкъ. Квиллинг (кягъытбурув) ичюн керек: ренкли кягъыттан тар кягъыт ёлачыкълары, туткъал, макъас ве чокъ-чокъ сабыр.

4. Амелий ишке азырланув.

         Энди хавсызлыкъ техникасындан инструктаж  кечиреджекмиз .

         Макъаснен  хавфсыз ишнинъ къаиделери.

1.Озь иш еринде низамны реает эт!

2.Яхшы пекитильмеген макъаснен чалышма.

3.Макъаснен тек озь иш еринъде чалыш.

4.Макъасны алкъаларнен озюнъе къой.

5.Биревге узаткъанда, макъасны алкъаларынен огюне бер.

6.Макъасны ачыкъ алда къалдырма.

7.Макъаснен ойнама, макъасны бетинъе якъын кетирме.

         Туткъалнен хавфсыз ишнинъ къаиделери.

1. Туткъалнен чалышкъанда, керек олса, фырчынен чалыш.
2. Туткъалны шу дакъкъасы чалышмагъа керек олгъан микъдарда алмакъ керек.
3. Арткъач туткъалны йымшакъ чулнен яни ягъбезнен сыйпап ал.
4. Туткъалны ве фырчыны иштен сонъ сабуннен ювмакъ керек.

Талим алув (тренировочные) межгъулиетлер

   Ренкли кягъытны тар ёлачыкъларгъа кесемиз, оны спираль шеклинде бурамыз, сонъ ондан “козь”, яни “тамчы” иляхре шекиллерини япамыз.

         Квиллинг техникасы.

         Бир тар кягъыт ёлачыкъны эки пармагъымызнен аламыз. Экинджи къолнынъ эки пармагъынен ёлачыкънынъ уджуны созамыз ве буклеймиз. Буклеген уджуны бизге (шило), яни пек индже агъач парчачыгъына сарамыз. Бир къач кере сыкъ этип бурамыз.

         Валикнинъ диаметри ¾ мм олгъан сонъ оны мумкюн тек къолнен бурмагъа.

         Сыкъ дискни эки къолумызнен бурамыз ве  даркъалмасын деп, яхшы тутамыз. Энди пармакъларымызни азачыкъ бошатамыз, ве “спиралимиз” бир парча даркъала.

         Сонъ ПВА туткъалынен ёлачыкънынъ уджуны туттырамыз.

         Энди азырлавны эки пармакъ иле сыкъамыз. “Тамчы” азырлавы олып чыкъты. Бу азырлавгъа чешит тюрлю шекиллер бермек мумкюн.

Физкультдакъикъасы.

Талебелерининъ мустакъыль иши.

Талебелер экишер (яни группаларнен) чалышалар.

Ишни нумюне иле япалар, яни композицияны мустакъыль шекильде тюшюнип тапалар.

- Балалар  чалышкъан арада, оджа шимдики инструктажны бере.

- Талебелернинъ иш ерлерининъ азырлыгъыны тешкерюв.

- Талебелернинъ вазифени беджергенде, хавфсызлыкъ техникасынынъ къаиделерини беджергенлерини тешкерюв.

- Вазифени беджерюв инструкцияларны берюв, зайыфча талебелерге ярдым этюв.

- Иш ерлерини джыйыштырув.

5. Дерснинъ нетиджесини чыкъарув.

Рефлексия кечирюв.

Биз бугуньсизлернен буюк иш беджердик.

- Дерсимизнинъ мевзусы насыл эди?

- Насыл янъылыкълар дерсте озюмиз ичюн  бильдик?

- Насыл макъсатлар огюмизге къойдыкъ?

- Макъсадымызгъа  ириштикми?

- Озь ишинъизненъ мемнюнсизми?

- Озь ишинъизни бааламакъ ичюн, озюнъизге бир «смайлик» сайлап алынъыз.

Япылгъан ишлернинъ сергиси.

Оджанынъ нетиджелев сёзю.

Мен беллесем, дерске къоюлгъан макъсатларгъа ириштик, оларны беджердик.

5. Эв вазифеси.